હું તને પ્રેમ કરું છું

 

મને સતત શોધવા મથતી  

તારી આંખો 

મારા કાનમાં સતત પડઘાતો 

તારો અવાજ 

મારી પીઠમાં અથડાતા 

તારા શ્વાસ 

તારી નાજુક આંગળીઓનો 

ભીનો સ્પર્શ 

ના થવા દેતા ક્યારેય તારાથી અલગ 

તો હું  કેમ કહું કે  તને યાદ કરું છું  

હું જ્યાં પણ હોઉં  

જે પણ કરું  

મારી લાગણીઓ,  

મારા શબ્દો,  

મારા આંસુમાં તું જ છે, 

મારું સ્મિત, 

મારા વિચારો, 

મારા સ્વપ્નોમાં પણ તું જ છે 

 

મારો ક્રોધ 

 

મારો આવેશ 

 

મારી અકળામણ  

દરેકમાં માત્ર તું તું ને તું જ…… 

તેમ છતાય

જા,  

તને નથી જ કહેવું  

કે  

હું તને પ્રેમ કરું છું

 

 

તારી મુલાકાત

 

 

તારું મને

હંમેશ

આમ અલપ ઝલપ  મળી

ને જતા રહેવું

તે જોઇને

ઘણીવાર એમ થાય છે કે

તને મારા હૃદયમાં

ફીટ કરી દઉં

જેથી તું ક્યાય જાય જ નહિ

પણ સાથે

એવો વિચાર પણ આવી

જાય છે કે

મારું તને ફીટ કરવું

કદાચ તારા મારી પ્રત્યેના

પ્રેમને

ગુંગળાવી મારશે

ને પછીના તારા અબોલા

અસહ્ય હશે…..

ચાલ  જવા દે,

તું તો ઉડતું પંખી છે

તને તારું ગગન મુબારક

મારે તો બસ તું મારી ડાળ પર આવીને બેસે

તેવી અલપ ઝલપ મુલાકાત જ

બસ છે……